Казанда яшәүчеләрнең 68 проценты даими рәвештә спорт белән шөгыльләнә
Казан спортчылары 2025 елда Россия һәм халыкара ярышларда 3,2 меңгә якын бүләк яулаган. Чагыштыру өчен, 2005 елда алар нибары 708 булган. Шул ук чорда даими рәвештә спорт белән шөгыльләнүче халык саны 12,5 проценттан 68 процентка кадәр арткан. Бу хакта Казан шәһәр Думасының хисап сессиясендә Татарстан башкаласы мэры Илсур Метшин сөйләде.
Шәһәрдә барлыгы 150 меңнән артык спортчы катнашында халыкара, федераль һәм төбәк дәрәҗәсендәге 532 ярыш уздырылган. Чагыштыру өчен, 2005 елда 135 ярыш үткәрелгән, аларда 30 меңнән артык кеше катнашкан.
«Казан ышанычлы рәвештә илнең спорт тормышында лидер статусын раслый. Бүген безнең стадионнарда, мәйданчыкларда һәм бассейннарда дәресләр һәм ярышлар иртәдән кичкә кадәр язылган. Спорт казанлыларның көндәлек тормышының бер өлешенә әверелде», - дип билгеләде Метшин.
2009 елдан шәһәрдә спорт объектлары саны ике тапкырга диярлек артты – 323 тән 644 кә кадәр. 2025 елда 11 яңа объект ачылды, шул исәптән «Рубин» академиясе базасында футболны үстерү үзәге, заманча фехтование үзәге, «Лайм» падел үзәге һәм сигез универсаль спорт мәйданчыгы.
Ел нәтиҗәләре буенча Казанда яшәүчеләрнең 68 проценттан артыгы актив һәм сәламәт яшәү рәвеше алып бара, даими рәвештә спорт белән шөгыльләнә.