Чилаверт «Реал»да кўпчилик қора танли, нега фақат Винисиус нишонда
Афсонавий дарвозабон Хосе Луис Чилаверт «Бенфика» – «Реал» учрашувидан кейин юзага келган навбатдаги ирқчилик можаросига муносабат билдирди. Парагвайлик футболчининг айтишича, Мадрид клубида қора танли футболчилар жуда кўп бўлса-да, муаммолар доим Винисиус Жуниор атрофида тўпланаётгани саволлар туғдиради. Бу ҳақда euro-football.ru хабар беради.
«Реал» таркибининг қарийб 90 фоизи қора танли. Нега уларда ҳеч қачон муаммо бўлмайди, Винисиусда эса деярли ҳамма билан чиқади?» — деди Чилаверт Radio Rivadavia эфирида.
Эслатиб ўтамиз, Винисиус Жуниор «Бенфика» футболчиси Жанлука Престианнини ирқчиликда айблаган. Аргентиналик футболчи бу даъволарни рад этмоқда. УЕФА ҳолат юзасидан текширув бошлаган, агар ҳақоратлар тасдиқланса, Престианнига 10 ўйиндан иборат дисквалификация берилиши мумкин.