Наумов Моуриню учун Саудия Арабистонини мос кўрди
"Локомотив"нинг собиқ президенти Николай Наумов "Бенфика" бош мураббийи Жозе Моуриню фаолиятини давом эттириши учун энг мақбул манзил сифатида Саудия Арабистони чемпионатини тилга олди. У бу фикрини "Евро-Футбол.Ru"га берган интервьюсида билдирди. Бу ҳақда euro-football.ru хабар беради.
Наумовнинг айтишича, Моуринюнинг энг юқори даражадаги даври ортда қолган, у эса футбол тараққиётидан бироз ортда қолгандек кўринади. Экспертнинг фикрича, авваллари сирли ва кутилмаган қарорлари билан ажралиб турган мутахассис ҳозирда одатдаги, ўртача мураббий таассуротини қолдирмоқда.
Шу боис Наумов Моуриню учун Саудия Арабистони варианти айни муддао эканини таъкидлади: у ерда маошлар катта, можароларни яхши кўришади ва ёши катта, номдор футболчилар билан ишлаш имконияти бор. Унингча, бу муҳит португалиялик мураббийга мос тушади.
Маълумот учун, Моуриню бошқарувидаги "Бенфика" Чемпионлар лигаси 1/16 финалида Мадриднинг "Реал"ига қарши майдонга тушади. Дастлабки учрашув 17 февраль куни Португалияда бўлиб ўтади.