Каррерас Мбаппени ҳақиқий монстр деб атади
Мадриднинг “Реал” клуби чап қанот ҳимоячиси Альваро Каррерас жамоадоши Килиан Мбаппе ҳақида фикр билдирди. Бу ҳақда euro-football.ru хабар беради.
“Валенсия”га қарши учрашувда 2:0 ҳисобидаги ғалабани айнан Каррерас ва Мбаппе таъминлади: испаниялик 65-дақиқада, француз эса 91-дақиқада рақиб дарвозасини ишғол қилди.
“Мбаппе — ҳақиқий монстр. Жамоада шундай футболчи борлиги жуда зўр. Бу ерга келганимнинг илк кунидан бери у менга ёрдам бериб келмоқда, у учун хурсандман”, — дея Каррераснинг сўзларини Madrid Xtra манбасига таяниб “Gazeta.Ru” келтирди.
Мбаппе Ла Лигада 22 ўйинда 23 гол уриб, тўпурарлар пойгасида етакчиликни ишончли ушлаб турибди. Ҳужумчи барча мусобақаларда эса 31 учрашувда 38 бор рақиб дарвозасини ишғол қилган.