2030 йилги мундиал финалини Испания қабул қилиши мумкин
2030 йилги футбол бўйича жаҳон чемпионати финал учрашуви Испанияда ўтказилиши мумкин. BBC хабарига кўра, бу ҳақда мамлакат футбол федерацияси президенти Рафаэл Лузан маълум қилган. Бу ҳақда euro-football.ru хабар беради.
Эслатиб ўтамиз, турнирни Испания, Португалия ва Марокко ҳамкорликда ўтказади. Мусобақанинг илк учта ўйини эса мундиалнинг 100 йиллиги муносабати билан Уругвай, Аргентина ва Парагвайда бўлиб ўтади.
Лузан Испания кўп йиллардан бери йирик мусобақаларни ташкил этиш бўйича ўз салоҳиятини исботлаб келаётганини таъкидлади. Унинг сўзларига кўра, 2030 йилги мундиалда Испания етакчи ролни бажаради ва финал ҳам айнан шу ерда ўтади. Бироқ у қайси стадион танлангани ҳақида аниқлик киритмади.
Аввалроқ Марокко томони финални Касабланкадаги «Гранд Стад Хассан II» стадионида ўтказишни истаётганини билдирганди. 2028 йилга қадар якунланиши режалаштирилаётган ушбу арена 115 минг мухлисни сиғдира олиши кутилмоқда. FIFA эса ҳозирча ҳал қилувчи ўйин қаерда бўлиб ўтиши юзасидан расмий изоҳ бермаган.