Тер Штеген «Жирона»да қисқа фурсатда мухлислар севимлисига айланди
Германиялик дарвозабон Марк-Андре тер Штеген «Барселона»ни тарк этиб, «Жирона» сафига қўшилди. Каталониядаги янги клубида у илиқ кутиб олинди. Бу ҳақда euro-football.ru хабар беради.
Жамоа бош мураббийи Мичел тер Штеген трансфери ўз ташаббуси эканини таъкидлади: «Уни айнан мен танладим. У ҳануз энг юқори даражадаги дарвозабонлар қаторида», деди у мухлисларга.
Мураббий футболчининг майдондаги роли фақат дарвозани қўриқлаш билан чекланмаслигини ҳам қайд этди: «У биз учун ажойиб дебют қилди. Оёқда ўйнаши, майдонни кўра билиши жуда фойдали. Мен уни нафақат дарвозабон, балки майдондаги ўйинчи сифатида ҳам таклиф қилгандим», дея фикр билдирди.
Ҳозирда «Жирона» Испания чемпионати турнир жадвалида 9-ўринда бормоқда. Ла Лиганинг кейинги турида каталонияликлар январ ойининг сўнгги кунида «Овьедо»га қарши майдонга тушади.