«Фенербахче» собиқ футболчиси Моуринью ваъдасида турмади деди
«Фенербахче»нинг собиқ футболчиси Линколн Жозе Моуринью билан боғлиқ ҳолатдан норози эканини билдирди. Португалиялик мутахассис Истанбул клубини 2024–2025 йилларда бошқарган. Бу ҳақда euro-football.ru хабар беради.
Линколннинг айтишича, Моуринью унга берган ваъдасини бажармаган ва ўзини ҳурматсиз тутган. Футболчи ижара асосида «Халл Сити»га кетишидан аввал мураббий билан гаплашганини, Моуринью эса уни Португалиядаги ёзги йиғинга кутаётганини айтганини таъкидлади.
Мавсум якунлангач, у йиғинга чақирув кутган, бироқ мураббий билан боғланишга уринганида Моуринью мулоқот қилишдан бош тортган. Линколннинг сўзларига кўра, унга спорт директорига мурожаат қилиш тавсия қилинган, кейин эса жамоа Португалияда бўлган пайтда у Истанбулга юборилиб, алоҳида шуғулланиш буюрилган.
Футболчи буни адолатсизлик ва ҳурматсизлик деб баҳолади: у кўплаб учрашувларда клубга ёрдам бериш учун бор кучини берганини, баъзан ўз позициясида ўйнамаган бўлса ҳам вазифасини бажарганини айтди. Шунингдек, оғир жароҳатдан кейин қўллаб-қувватлаш кутганини, аммо бундай ёрдамни ҳис қилмаганини қўшимча қилди.
Линколн бу фикрларни Fanatik нашрига берган интервьюсида маълум қилди. Ҳозирда Жозе Моуринью «Бенфика»ни бошқармоқда.