2030 йилги ЖЧ финалини Испания ўтказиши мумкин
2030 йилги футбол бўйича жаҳон чемпионати финали Испанияда бўлиб ўтиши мумкин. BBC хабарига кўра, буни мамлакат футбол федерацияси президенти Рафаэл Лузан маълум қилган. Бу ҳақда euro-football.ru хабар беради.
Турнирни Испания, Португалия ва Марокаш биргаликда қабул қилади. Мусобақанинг дастлабки уч учрашуви эса мундиалнинг 100 йиллиги муносабати билан Уругвай, Аргентина ва Парагвайда ўтказилиши режалаштирилган.
Лузан Испания кўп йиллардан бери йирик мусобақаларни юқори савияда ташкилаштириб келаётганини таъкидлаб, 2030 йилги мундиалда мезбонлик жараёнида етакчи роль ўйнашини ва финал ҳам шу ерда бўлишини айтди. У қайси стадион танлангани бўйича аниқлик киритмади.
Аввалроқ Марокаш томони финални Касабланкадаги “Grand Stad Hassan II” аренасида ўтказишни истаганини билдирганди. Қурилиши 2028 йилда якунланиши кутилган стадион 115 минг томошабинга мўлжалланган. FIFA эса ҳозирча ҳал қилувчи ўйин қаерда бўлиши ҳақида изоҳ бермади.