Татарстаннан 200гә якын бала Яңа елны Кара диңгез буенда каршылады
Кара диңгез яр буенда «Сәләт – Ак Барс» яшьләр үзәгендә «Офык. Кышлау» Яңа ел профильле сменасы тәмамланды. 27 декабрьдән 7 гыйнварга кадәр сменада Татарстан, Кырым, Краснодар, Мәскәү һәм Уфадан 240 бала катнашты.
Смена программасы байлыгы һәм инновациялелеге белән аерылып торды. Беренче тапкыр яшь буенча отрядлар формалаштыру системасы кертелде, бу оештыручыларга һәр баланың индивидуаль үзенчәлекләрен исәпкә алырга мөмкинлек бирде. Белем бирү блогы график дизайн, театр сәнгате, инглиз һәм кытай телләре, шулай ук скалодром һәм заманча кул эшләре иҗади лабораториясен үз эченә алган.
Тематик мастер-класслар – чыршы уенчыклары ясау, аквагрим, социаль челтәрләрдә алга этәрү нигезләре зур популярлык казанды. Сәламәтләнүгә аерым игътибар бирелде: һәр иртә саф диңгез һавасында сулыш гимнастикасыннан башланды.
Лагерь директоры Кира Маслова билгеләп үткәнчә, бу яңа ел сменасы чын-чынлап әкияти һәм онытылмаслык булды.
«Сәләт-Ак Барс» яшьләр үзәге ел әйләнәсе белем бирү һәм сәламәтләндерү үзәге булып тора. Лагерь базасы 2022 елның 5 июленнән Форос бистәсендә Татарстан Рәисе Рөстәм Миңнеханов ярдәме белән ачылды.