Экспертлар Ҳусанов ва бошқа футболчиларнинг ўйинини қандай баҳолади?
Англия Лигаси кубоги (Карабао кубоги) ярим финалининг биринчи ўйинида “Манчестер Сити” сафарда “Ньюкасл”ни 2:0 ҳисобида мағлуб этиб, жавоб беллашуви олдидан ўзини анча эркин ҳис қиладиган натижага эришди. Шовқинли стадион, жисмонан бақувват рақиб ва босимга қарамай, “шаҳарликлар” вазиятни назоратда ушлаб, имкониятлардан унумли фойдаланди.
Меҳмонларнинг ғалабасини Райан Шерки ҳамда Антуан Семеньонинг биттадан голи таъминлади. Учрашувда Ўзбекистон миллий терма жамоаси ҳимоячиси Абдуқодир Ҳусанов тўлиқ 90 дақиқа ҳаракат қилди ва жамоада энг барқарор кўринган ўйинчилардан бири бўлди.
Нуфузли манба — cityxtra.co.uk экспертлари баҳсдан кейин “Манчестер Сити” футболчиларининг ҳаракатларини баҳолади. Қуйида ўша рейтинглар ва қисқа изоҳлар:
“Манчестер Сити” футболчилари баҳолари
Жеймс Траффорд — 7,5
Турнирдаги энг ёрқин сейвлардан бирини амалга ошириб, Виссанинг бош билан йўллаган зарбасини тўсинга теккизиб қайтарди. Умуман олганда, катта босим бўлмади, лекин ўзи учун ишончли ўйин бўлди.
Матеус Нуньес — 5
Танаффус олдидан Гордонга қарши қўпол ҳаракати учун сариқ олди. Биринчи бўлимда анча ишончсиз кўринди, мавсумда яхши ўйинлари борлигини ҳисобга олсак, бу унга ярашмади.
Абдуқодир Ҳусанов — 7,5
Айрим эпизодларда тўп билан эҳтиёткорлик етмагандай туюлди, аммо ҳимояда жуда мустаҳкам ўйнади. Рубен Диаш ва Йошко Гвардиол йўқлиги сезилиб турган пайтда, ўзбекистонлик ҳимоячи жамоа мудофаасига катта ҳисса қўшди.
Макс Аллейн — 7,5
20 ёшига қарамасдан, асосий таркибда ўзини жуда хотиржам тутиб ўйнаяпти. Гвардиоланинг уни жамоада сақлаб қолиш истаги бежиз эмаслиги кўринди.
Натан Аке — 6,5
Чап қанот ҳимоясида яна тартибли ўйин кўрсатди. Сергак ҳаракат қилди, унинг бир узатмаси Траффордни ноқулай аҳволга солиб қўйиб, деярли автоголга сабаб бўлаёзди.
Нико О’Райли — 6
Жоэлинтонни тўпдан узоқлаштириш пайтида кераксиз сариқ олди. Шунга қарамай, марказда ўзини яхши кўрсатиб, универсаллигини намоён қилди.
Бернарду Силва — 7,5
Кўп фол ишлади, айрим хатолари ҳам бўлди. Бироқ барибир ақлли ва фойдали ўйин кўрсатиб, голли пас билан жамоага наф келтирди.
Фил Фоден — 6
Ҳимояга кўмаклашди, аммо ҳужумда одатдагидек таъсирчан бўлмади. Уни алмаштириш қарорини экспертлар тўғри деб баҳолади.
Антуан Семеньо — 8 (ўйиннинг энг яхши футболчиси)
Жисмоний тайёргарлиги ва ҳаракатчанлиги билан ажралиб турди. Ҳушёрлиги туфайли яна бир гол урди. Экспертлар фикрича, иккинчи голи ҳам ҳисобга олиниши мумкин эди.
Жереми Доку — 7
77-дақиқагача “Ньюкасл”га анча муаммо туғдирди. Чап қанотда жуда фаол ҳаракат қилиб, биринчи голга йўл очган эпизодда асосий рол ўйнади.
Эрлинг Холанд — 5,5
Аниқ голли имкониятлар кўп бўлмади. Унинг жисмоний кучи стандарт вазиятларда фойдали, аммо ҳозирча голлар жиҳатидан кутилган самара бермаяпти.
Захирадан тушганлар
Райан Айт-Нури — 7
Ўйин охирида рақиб босимига қарши тўғри ҳаракат қилди, жамоага хотиржамлик олиб кирди ва ҳал қилувчи голга ассист берди.
Райан Шерки — 7,5
Захирадан тушиб, жуда фаол кўринди. Қарши ҳужумларда қатнашиб, охирги дақиқаларда ҳал қилувчи голни урди.
Рико Льюис — 6
Ўнг қанотда Нуньесга нисбатан ишончлироқ вариант эканини кўрсатди. Қолган дақиқаларда барқарор ўйнади.
Родри — 6,5
Унинг майдонга тушиши “Сити”га жуда керак эди. Марказда назорат, хотиржамлик ва тўпни ушлаб туришни таъминлади.
Тижани Рейндерс — 6
Фоден ўрнига яхши қўшилди, фаол ҳаракатлари билан бош мураббийга таркиб танлашда “тотли бош оғриқ” қолдирди.
Умумий манзара шундай: “Сити” сафардаги 2:0 ҳисобидаги ғалаба билан вазифанинг ярмини бажарди. Биз учун эса энг ёқимлиси — Ҳусановнинг 90 дақиқа давомида ишончли ўйини ва экспертлардан юқори баҳо олгани. Шу темпда давом этса, “шаҳарликлар” ҳимоясида “ўз одамимиз”нинг ўрни янада мустаҳкамланади.