«Милан» А Серияда 18 ўйиндан бери мағлуб бўлмаяпти
Сўнгги учрашувларда ўйини унчалик ёрқин кўринмаётган бўлса-да, «Милан» барибир натижа олишда давом этмоқда: Массимилиано Аллегри жамоаси А Серияда кетма-кет 18 та ўйинда ютқазмади. Бу ҳақда euro-football.ru хабар беради.
Мавсумнинг илк турида «Кремонезе»га мағлуб бўлганидан кейин миланликларни қийин синовлар кутди, бироқ улар ҳар сафар мағлубиятдан қутулиб қолди. Худди шу сценарий «Женоа» ва «Фиорентина»га қарши сўнгги баҳсларда ҳам такрорланди.
«Милан» бундан ҳам узоқроқ мағлубиятсиз серияни охирги бор 2004 йилда қайд этган — Карло Анчелотти даврида жамоа 19 та ўйин давомида ютқазмаган.
Шунга қарамай, бу оралиқда клуб икки бор мағлуб бўлди: аввал Италия Кубогида, кейин эса Суперкубокда. Натижада «Милан» ҳар икки мусобақани ҳам муддатидан олдин тарк этди.