"Барселона" президенти: "Реал"нинг бу иши мени ҳайрон қолдирди...
Испания Суперкубоги финалидан кейин «Барселона» президенти Жоан Лапорта «Реал» футболчиларининг хатти-ҳаракатидан очиқча ҳайратда қолди. Каталония гранди кескин ва драматик баҳсда «қироллик клуби»ни 3:2 ҳисобида мағлуб этиб, навбатдаги совринни қўлга киритди.
Маълум бўлишича, тақдирлаш маросими чоғида «Реал» футболчилари ғолиб жамоа учун чемпионлик коридорини ташкил этмаган. Айрим манбаларга кўра, Килиан Мбаппе жамоадошларига «Барселона» шарафи учун йўлак очмасликни маслаҳат қилган. Бу ҳолат Лапортанинг кескин муносабатига сабаб бўлди.
Эътиборли жиҳати шундаки, финалга қадар «Барселона» футболчилари турнирда иккинчи ўринни олган «Реал»га нисбатан фахрий йўлак ташкил этишган эди. Бу эса Лапортанинг фикрича, футболдаги одоб-ахлоқ ва ўзаро ҳурмат намунаси ҳисобланади.
— Биз майдонда рақибдан анча устун эдик. Агар имкониятлардан яхшироқ фойдаланганимизда, ҳисоб янада йирик бўлиши мумкин эди. Ростини айтсам, ўйин давомида рақибни ўн баллик шкалада олти ярим даражада қийналган деб баҳолайман, — деди «Барселона» президенти.
Лапорта ўйин назорати масаласига ҳам алоҳида тўхталди. Унинг таъкидлашича, «Барселона» бутун учрашув давомида ташаббусни қўлдан бермаган. — Биз ўйинни бошқариб турдик, бу эса жамоага хотиржамлик бағишлади. Албатта, «Реал» ҳар қандай қарши ҳужумда хавф солиши мумкин, лекин бугун сценарий биз истагандек кечди. Бу идеалга яқин ўйин бўлди, — деди у.
Президент энг асосий масала — ҳурмат тамойили эканини уқтирди. — Ютасизми ёки ютқазасизми, рақибга нисбатан ҳурмат сақланиши шарт. Биз майдонда ҳам, ундан ташқарида ҳам маданиятли бўлдик ва ғалабани шараф билан қўлга киритдик, — дея қўшимча қилди Лапорта.
Шунингдек, у «Сантьяго Бернабеу»даги аввалги учрашувдан кейин (1:2) «Реал» футболчиларининг асабий ҳолати сақланиб қолган бўлиши мумкинлигини ҳам таъкидлади. — Ўша мағлубиятдан кейин уларнинг жаҳли чиққан эди. Аммо биз футболчиларимиз ўзларини жуда профессионал тутишганини кўрдик. Эҳтимол, «Барса»нинг ғалаба қозониш эҳтимоли юқори эканини олдиндан ҳис қилишган, — деди клуб раҳбари.
Қисқаси, финал нафақат майдонда, балки майдон ташқарисида ҳам катта муҳокамаларга сабаб бўлди. «Барселона» эса навбатдаги совринни олиш билан бирга, ўз қадриятларига содиқ қолганини яна бир бор намоён этди.