Ханси Флик “Реал” устидан қозонилган ғалабани қандай баҳолади?

“Барселона” бош мураббийи Ханси Флик “Реал Мадрид”га қарши 3:2 ҳисобидаги драматик ғалабадан сўнг ўз таассуротлари билан ўртоқлашди ва бу натижа жамоа учун нақадар муҳим эканини алоҳида таъкидлади.

Немис мутахассисининг сўзларига кўра, финал ўйини жуда катта аҳамиятга эга бўлган ва “Реал” каби принципиал рақибга қарши баҳс ҳар доим юқори суръат ҳамда кучли рақобат остида ўтади. У жамоаси майдонда режалаштирилган тактик режани аниқ бажарганидан ғурурланишини билдирди.

"Ажойиб, бу жуда муҳим финал эди. "Реал"га қарши ўйинлар ҳар доим жуда қизиқарли бўлади. Мен фахрланаман, биз айнан режалаштирганимиздек ўйнадик.", — деди каталонияликлар бош мураббийи.

Флик ҳозирча кийиниш хонасига кирмаганини, футболчилар эса ғалабани нишонлаб, байрам муҳитида эканини айтди. У шогирдларининг кайфиятини кўриб, жамоанинг ўйинидан янада фахрланганини яширмади. Бош мураббийнинг таъкидлашича, “Барселона” учрашув давомида тўпни ҳам, ўйин ритмини ҳам назорат қила олган.

Унинг фикрича, баҳс осон кечмаган, бироқ жамоа сифатида охиригача кураш олиб борилган. Ҳар бир футболчи майдонда ўз вазифасини сидқидилдан бажарган ва якунда жамоавий ҳаракат ғалабани таъминлаган.

"Мен ҳали кийиниш хонасига кирмадим, футболчилар ҳозир байрам қилишяпти, фақат уларнинг рақс тушаётганини кўрдим. Жуда фахрланаман — биз ниҳоятда яхши ўйнадик, тўпни ҳам, ўйинни ҳам назорат қилдик. Якунда бутун жамоа биз истаган тарзда ҳаракат қилди. Осон бўлмади, биз ғалаба учун жамоа сифатида кураш олиб бордик.", — деди Ханси Флик.

Шунингдек, Флик айрим футболчиларнинг руҳий тайёргарлигига ҳам тўхталиб ўтди. Айниқса, Рафиньянинг менталитети унда катта таассурот қолдирган. Гарчи у илк вазиятдан фойдалана олмаган бўлса-да, кейинги имкониятни аниқ голга айлантириб, жамоасига устунлик олиб келган.

Ханси Фликнинг таъкидлашича, бундай характер ва иродага эга футболчилар бутун жамоага ижобий таъсир кўрсатади ва катта ғалабалар айнан шу жиҳатлар эвазига қўлга киритилади.

"Рафиньянинг менталитети мени ҳайратга солади, бизда шундай бошқа футболчилар ҳам бор, аммо у бутун жамоага таъсир ўтказади. У биринчи вазиятдан фойдалана олмади, аммо иккинчисини голга айлантириб, бизга устунлик берди", — деди каталонияликлар бош мураббийи.