Эксперт бәйрәмнәрдән соң беренче эш көненә алдан әзерләнергә киңәш итә

Озын бәйрәмнәрдән соң эшкә кайту һәрвакыт диярлек стресс барлыкка китерә, шуңа күрә беренче эш көненә алдан әзерләнергә кирәк. Бу хакта «RT» белән әңгәмәдә «Киләчәк һөнәрләре» үзәгенең карьера эксперты Святослав Семеренко сөйләгән.

Ул билгеләп үткәнчә, беренче эш көненең иртәсен, ашыгу һәм борчылу дәрәҗәсен киметү өчен, гадәтләнгән вакыттан бераз иртәрәк башлау яхшырак. Аның сүзләренчә, офиска килү белән эш ташкынына чумарга һәм җыелган барлык бурычларны хәл итәргә тырышырга кирәкми.

Эксперт беренче ярты сәгатьне тыныч стартка багышларга: каһвә эчәргә, килгән хатларны һәм хәбәрләрне карарга, ә аннары көнгә реалистик план төзергә тәкъдим итә. Аның фикеренчә, иң ашыгыч сораулардан башларга кирәк. Шуннан соң тупланган мәгълүматны ачыкларга, проектлар буенча статусларны яңартырга һәм кыска шалтыратулар башкарырга, ә аннары инде планлы бурычларга кайтырга кирәк.

Семеренко шулай ук беренче эш көнендә энергия сарыф итүче очрашулар уздырмаска киңәш итә. Ул искәрткәнчә, ялдан соң концентрация дәрәҗәсе гадәттәгедән түбән булырга мөмкин. Шуңа бәйле рәвештә белгеч һәр сәгать саен кыска паузалар ясарга киңәш итә.