Антуан Семеньо 72 млн еврога «Манчестер Сити»га ўтди

Ганалик ҳужумчи Антуан Семеньо «Манчестер Сити» сафига қўшилди. Клуб матбуот хизмати тарқатган хабарга кўра, футболчи билан тузилган шартнома 2031 йил ёзигача мўлжалланган. Бу ҳақда kursiv.uz хабар беради.

ОАВдаги дастлабки маълумотларга қараганда, трансфер қиймати 72 млн еврoни ташкил этган. Семеньо «шаҳарликлар» сафига ўтишини изоҳлар экан, ўзида янада ўсиш учун катта имконият борлигини, шу босқичда айнан ушбу клубда бўлиш унинг фаолияти учун энг мақбул танлов эканини таъкидлади.

У бунгача 2023 йил январ охиридан 2026 йил январ бошигача «Борнмут» шарафини ҳимоя қилган. Семеньо бу жамоа таркибида 110 учрашувда майдонга тушиб, 32 бор рақиб дарвозасини ишғол қилган.

Ганалик футболчининг профессионал йўли 2018 йилда «Бристол» ёшлар жамоасидаги дебютидан бошланган. Кейинчалик у «Сандерленд», «Ньюпорд» ва «Бат Сити» каби клубларда ҳам тўп сурган.

9 январ ҳолатига кўра, «Манчестер Сити» Англия Премьер-лигасида иккинчи ўринда бормоқда. Турнир жадвалида «Арсенал» етакчилик қилмоқда, кучли учликни «Астон Вилла» якунлаб турибди. Семеньо аввал ўйнаган «Борнмут» эса 15-поғонада жойлашган бўлиб, унинг ёнида мос равишда 14- ва 16-ўринлардаги «Тоттенҳэм» ҳамда «Лидс» турибди.