Осиё кубоги U-23. Япония Сурияга 5 та гол урди, Қатар БААга ютқазди

Саудия Арабистонида старт олган U-23 Осиё кубогида “B” гуруҳининг 1-тур ўйинлари ҳам мухлисларга анча “иссиқ” кечани совға қилди. Турнирнинг амалдаги чемпиони саналган Япония бу сафар ҳам гапини майдонда айтди: Сурия дарвозасига жавобсиз 5 та тўп киритиб, рақибни илк турнинг ўзидаёқ руҳан “синдириб” қўйди.

Учрашувда ҳисоб 10-дақиқада Озекининг голи билан очилди. Кейин эса японлар ўйинни тўлиқ назоратга олди: иккинчи таймда Сато икки бор (66 ва 75-дақиқалар) нишонга олди, Ишибаши 87-дақиқада фарқни янада оширди. Якунда эса Мичиваки пенальтидан (90+3) нуқта қўйиб, таблода 5:0 рақамини “муҳрлаб” қўйди.

Япония — Сурия 5:0
Голлар: Озеки (10), Сато (66, 75), Ишибаши (87), Мичиваки (90+3, пеналти).

Гуруҳнинг иккинчи ўйинида эса Қатар учун кеча жуда оғир ўтди. Учрашувнинг 3-дақиқасидаёқ Ал Ҳусайн пенальтини ура олмади — ва айнан шу эпизод кейинги воқеаларга “спойлер” бўлиб чиқди. БАА эса ўз имкониятларини аниқ ишлатди: 21-дақиқада Ал Мемори ҳисобни очди, 37-дақиқада Ндиайе иккинчи голни киритиб, Қатарни қийин аҳволга солиб қўйди — 0:2.

Қатар — БАА 0:2
Голлар: Ал Мемори (21), Ндиайе (37).
Фойдаланилмаган пеналти: Ал Ҳусайн (3, Қатар).

Энди “B” гуруҳидаги интрига янада қизийди: иккинчи турда Япония ва БАА ўзаро тўқнаш келади — бу баҳс гуруҳ пешқадамини аниқлаб бериши мумкин. Қатар эса Сурияга қарши майдонга тушиб, ўзини “қайта тирилтириш”га уринади. Қисқаси, кейинги турда пультни маҳкам ушланг — бу гуруҳ ҳали кўп “сюрприз” тайёрлаб қўйган.