«Манзара» спорт премиясе нинди форматта узачагы билгеле
18 гыйнварда Казанның «Ак Барс» Көрәш сараенда чираттагы «Манзара» спорт-музыкаль премиясе узачак. Тантана кысаларында тамашачыларны мавыктыргыч көрәш бәйгесе һәм зур шоу-программа көтә. Ярышлар «стенка на стенку» форматында һәм шәхси зачетта узачак. «Стенка на стенку» форматында ике команда – Казанның «Зилант» командасы һәм Чаллы шәһәре җыелма командасы көч сынашачак.
Оештыручылар бәйгедә катнашачак көрәшчеләр исемлеген игълан итте, алар:
Илфат Миңнегалиев – Ильяс Йосыпов;
Артур Хәкимов – Илнар Закиров;
Динар Кәримуллин – Илназ Рамазанов;
Ренас Кәлимуллин – Рөстәм Сәлахов;
Марат Миначев – Эльдар Хәмитов;
Альберт Ситдыйков – Ринат Дәүләтшин.
«Мастерс» категориясендә Фәһим Ибатуллин белән Айнур Әнвәров көч сынашачак.
Спорт бәйгесе танылган артистлар катнашындагы музыкаль шоу-программа белән үрелеп барачак. Оештыручылар тамашачылар өчен махсус бүләк тә әзерләгән, сатып алынган билетлар буенча уйнатылачак лотереяның төп призы –квадроцикл.
Фото: © «Манзара» спорт-музыкаль премиясе