Рөстәм Миңнеханов Казан Кремлендә дәүләт бүләкләре тапшырды
Бүген Татарстан Рәисе Рөстәм Миңнеханов Казан Кремлендә алдынгы татарстанлыларга Россия Федерациясе һәм Татарстан Республикасы дәүләт бүләкләрен тапшырды.
«Яңа ел алдыннан без Казан Кремлендә алдынгы татарстанлыларны хөрмәтлибез. Бүген бу залда республиканы вәкиллек иткән кешеләр – безнең өчен профессиональлек, хезмәткә тугрылык, гаделлек һәм Ватанга хезмәт үрнәге», – дип белдерде Миңнеханов бүләкләү тантанасында.
Ул Татарстан 2025 елны макроикътисади күрсәткечләр буенча алдынгы позицияләрдә тәмамлавын, Россиянең терәк регионы статусын саклап калуын билгеләп үтте. Бу уңышлар Россия Президенты Владимир Путин һәм Хөкүмәтнең ярдәменнән башка мөмкин булмас иде.
«Быел Ватанны саклаучылар елы һәм Бөек Ватан сугышында Җиңүнең 80 еллыгы билгеләп үтелде. Республикада тантаналы чаралар үтте, ветераннар хөрмәтләнде. Тарихи хәтерне саклау, буыннар дәвамлылыгы һәм яшьләрне патриотик тәрбияләү мәсьәләләренә игътибарны дәвам итү мөһим», – дип ассызыклады Миңнеханов.
2026 ел Татарстанда Хәрби һәм хезмәт батырлыгы елы дип игълан ителде.
Миңнеханов ветераннарны аерым билгеләп үтте. «Бөек Ватан сугышы ветераны Федор Гарбуз – Казан авиация заводы ветераны, Хөбәйбә Баязитова – «Ак Барс» хоккей клубының иң тугрылыклы фанаты һәм ул үзенең 100 еллык юбилеен билгеләп үтә», – диде ул.
Татарстан Рәисе шулай ук гаилә кыйммәтләренә игътибар бирде. Бүген бүләкләнгән Сафиуллиннар гаиләсе биш бала тәрбияләп үстергән. Аларның улы – Айнур Сафиуллин, кыюлыгы һәм батырлыгы өчен Россия Герое исеменә лаек булды һәм бүген дә махсус хәрби операция зонасында хезмәт итә.
«Мондый гаиләләр – иң яхшы гаилә традицияләренең, дөрес һәм акыллы тәрбиянең чагылышы», – дип ассызыклады Миңнеханов.
«Ата-ана даны» ордены медале Альберт һәм Лилия Сафиуллиннарга тапшырылды. Алар 32 ел бергә гомер итәләр. Лилия Дамировна – бухгалтер, ә ире йорт җиһазлары җитештерү сәнәгатендә эшли.
«Татарстан алдындагы казанышлары өчен» ордены медале сугыш ветераннарына һәм махсус хәрби операциядә катнашучыларга тапшырылды.