Гвардиола: Ўз принципларимдан ҳеч қачон чекинмадим
“Манчестер Сити” бош мураббийи Хосеп Гвардиола жаҳон футболига бўлган таъсири ҳақида ўз фикрларини билдирди. Якшанба куни Гвардиола мураббийлик фаолиятидаги 1000-ўйинини ўтказади.
“Билмайман. Мен шунчаки жамоаларимнинг ўзи хохлаган услубда ўйнашини таъминлашга ҳаракат қилдим. Ҳеч қачон ўз принципларимни бузмаганман ва бу жараёнда кўп нарсаларни ўргандим ҳамда ўзгартирдим. Лекин қалбан ишонадиган тамойилларимдан бирор марта ҳам воз кечмаганман.
Чунки, ҳатто хатога йўл қўйган тақдирингизда ёки рақиб кучлироқ бўлса ҳам, ўзингиз ишонмайдиган бирор ишни қилганингизни ҳис қилмаслигингиз муҳим. Ва мен ҳеч қачон бундай ҳолатга тушмаганман”, - деди Гвардиола матбуот анжуманида.
Якшанба куни “Манчестер Сити” Англия Премьер-лигаси доирасида “Ливерпул”ни қабул қилади.