“Сити” ва “Реал” ўзаро Холанд ва Винисиус рокировкасини амалга оширадими?

Мадриднинг “Реал” клубида вазият янада кескинлашди — жамоа бош мураббийи Хаби Алонсо ва ҳужумчи Винисиус Жуниор ўртасида келишмовчилик пайдо бўлгани ҳақида маълум қилинди.

Испания оммавий ахборот воситалари хабарига кўра, бир неча ўйин давомида футболчининг майдондаги хатти-ҳаракатлари ва ҳиссиётларини назорат қила олмагани мураббийни жиддий безовта қилган. Алонсо унинг интизоми ва жамоага бўлган муносабатини танқид қилгани ортидан муносабатлар совиб кетган.

Шундан сўнг, бир қатор спорт экспертлари Винисиуснинг “Реал”даги келажаги тобора ноаниқ бўлаётганини таъкидламоқда. Уларга кўра, жамоа ички барқарорликни сақлаб қолиш учун футболчини сотиш вариантини ҳам кўриб чиқмоқда.

Маълумотларга кўра, Винисиус Жуниор билан Англия Премьер-лигасининг етакчи клублари алоқада. Хусусан, “Манчестер Сити” бразилиялик ҳужумчини анчадан бери кузатиб келмоқда ва унинг услуби Гвардиоланинг тактик режасига мос келиши қайд этилган.

Бироқ “Реал” клуби ҳам бўш қолиш ниятида эмас — мадридликлар “шаҳарликлар”нинг асосий тўпурари Эрлинг Холандни қўлга киритиш имкониятини ўрганмоқда.

Сўнгги кунларда айрим журналистлар икки гранд клуб ўртасида эҳтимолий “супер алмашув” — Винисиус ва Холандни бир-бирига алмаштириш ҳақида турли тахминларни ёзмоқда. Аммо бу вариантга яқин манбалар раддия берди.

“Defensa Central” нашри маълумотига кўра, “Манчестер Сити” раҳбарияти Холандни ҳеч қандай шароитда Винисиусга алмаштириш ниятида эмас. Манба таъкидлашича, норвегиялик тўпурар клубнинг келгуси йиллардаги бош лойиҳасининг асосий қисми ҳисобланади.

Бошқа маълумотларга кўра, Хосеп Гвардиола Холандни фақат битта ҳолда — агар “Сити” Ҳарри Кейнни жамоага олиб кела олса — сотиш ҳақида ўйлаши мумкин.

Ҳозирча “Реал” расмий изоҳ бермаган, аммо футбол жамоатчилиги бу вазият ортидан ёзги трансфер бозорида янги драма бошланишини кутмоқда.

Шубҳасиз, Винисиус каби юқори иқтидорга эга футболчи қаерда бўлмасин, диққат марказида бўлади. Аммо “Реал”даги бу зиддият унинг Европадаги келажагига ҳам таъсир кўрсатиши мумкин.