Бөгелмә районы Советы аппаратына яңа җитәкче билгеләнде
Светлана Лаптева Татарстанның Бөгелмә районы Советы аппаратына җитәкче итеп билгеләнде. Аны коллективка атналык киңәшмәдә район башлыгы Дамир Фәттахов тәкъдим итте.
«Светлана Владимировна – тәҗрибәле җитәкче, соңгы елда Әлмәт районы башкарма комитеты җитәкчесенең социаль мәсьәләләр буенча урынбасары булып эшләде. Аның җитәкчелегендә социаль сәясәтнең күп юнәлешләре яңа дәрәҗәгә чыкты. Республика дәрәҗәсендә аны энергияле, актив һәм бурычларны нәтиҗәгә китереп җиткерүче таләпчән менеджер буларак беләләр. Мондый тәҗрибә безнең команданы ныгыту һәм эшнең нәтиҗәсен арттыру өчен бик яхшы нигез булачак», – диде Дамир Фәттахов.
Район башлыгы сүзләренчә, мондый көчле белгечнең Әлмәттән Бөгелмәгә килүе – символик адым. Элегрәк белгечләр Әлмәттә эшләү өчен Бөгелмәдән китә торган булган. «Хәзер без бу тенденцияне үзгәртәбез һәм бу бөтен район өчен яхшы сигнал», – диде ул.