КФБ Жоэл Кожо Өзбекстандын “Нефтчи” футбол клубуна өткөнүн билдирди
Кыргызстандын футбол боюнча улуттук курама командасынын чабуулчусу Жоэл Кожо Өзбекстандын суперлигасында ойногон “Нефтчи” (Фергана) кулубуна өттү. Бул тууралуу Кыргыз футбол биримдиги кабарлады.
"Футболчу ирандык "Эстеглял" клубунун оюнчусу болуп саналат жана келишим боюнча ал сезондун аягына чейин Ферганада ойнойт. Жыйынтыгында ал кайрадан Иранга кайтып бармакчы",-деп жазылган маалыматта.
Былтыр жыл аягында Жоэл Кожо "жылдын мыкты футболчусу" аталган. Футболчу 2024-жылдын башында улуттук кураманын катарында Катарда Азия Кубогуна катышып, Оман курамасынын дарбазасына бир гол киргизген. Бул гол футболчуну Азия чөлкөмүндө атактуу кылган.
Жоэл Кожо 2018-жылы “Алай” футбол клубунда ойной баштаган жана Кыргызстандын чемпионатында мыкты чабуулчу аталган. 2021-жылдын башында “Дордойго” кошулган.
Футболчу 2023-жылы Өзбекстандын “Динамо” (Самарканд) клубуна барган. Кыргызстандын улуттук курама командасына кайра 2023-жылы чакырылган.