Sjåfør krasja fleire bilar – lange køar på staden

Ein bil skal ha køyrd i fjellveggen i ein eller fleire tunnelar mellom Vaksdal og Trengereid. Køyretøyet har krasja inn i minst to bilar. I tillegg er det funne ein velta MC i Trengereidtunnelen.

Naudetatane har rykka ut og vegtrafikksentralen har stengt Risnestunnelen, Romslotunnelen og Trengereidtunnelen på E16 i Arna.

Det er store trafikale utfordringar i området.

Politiet melder i ei oppdatering klokka 13.30 at tunnelane som var stengde, no blir opna.

Ifølge Knut Dahl- Michelsen, operasjonsleiar i Vest politidistrikt, er det ingen som har blitt skadde i hendinga.

Dei fekk melding om hendinga klokka 12.22.

Sjåføren er ein mann i 50-åra. Han verkar rusa, ifølge politiet.

Mannen køyrde i retning Bergen då hendinga skjedde.

– Bilen stoppa på Trengereid der publikum har oppheldt føraren til politiet kom fram til staden, skriv Dahl- Michelsen.

Trengereidtunnelen og Stavenestunnelen blir no undersøkt for skader. Dersom alt er i orden, er målet å opna vegen igjen så snart som råd, skriv politiet.