Казан аэропортында вакытлыча кертелгән чикләүләр гамәлдән чыгарылды
Казан аэропортында самолетларны җибәрү һәм кабул итүгә карата кертелгән вакытлыча чикләүләр гамәлдән чыгарылды, дип хәбәр итә Росавиация.
Билгеләп үтелгәнчә, чикләүләр гамәлдә булган чорда Татарстан башкаласына рейс ясаган алты самолет запас аэродромнарга «киткән».
Элегрәк «Татар-информ» агентлыгы Казан аэропортында вакытлы чикләүләр аркасында берничә дистә рейсның тоткарлануы хакында хәбәр иткән иде. Республика территориясендә иртәнге 4:47 сәгатьтән «пилотсыз очкычлар һөҗүм итү куркынычы» режимы гамәлдә булды, шуңа бәйле рәвештә мобиль интернет эшендә өзеклекләр булуы ихтимал.