«Илдан-Лик» мода театрының модель мәктәбе Казахстанда Халыкара конкурста җиңү яулаган
Казахстанның Актау шәһәрендә Model Cup-2025 Халыкара конкурсы тәмамланды. Төп бүләк өчен 8 илдән 74 модель көрәште. Өч көн дәвамында модельләр төрле номинацияләрдә актив катнашты: фотога төшү, милли киемнәрдә дефиле, импровизация.
Татарстанны «Илдан-Лик» модель мәктәбе тәкъдим итте һәм 3 бүләк алып кайтты. Model Cup 2025 халыкара конкурсында җиңүчеләребезне горурлык белән игълан итәбез: Диана Валле - 6-10 яшь категориясендә 1 урын, Амаль Әюпов - «Free Style» номинациясендә җиңүче, Риянна Галимова - «Free Style» номинациясендә җиңүче.
«Тышкы кыяфәт буенча гына түгел, ә тәҗрибә буенча, фотога төшү, дефиле һәм милли киемдәге фристайлны карап билгеләделәр. Без беренче чиратта модельләрнең матурлыгына түгел, ә аларның профессиональлегенә карадык. Төрле илләрдән, төрле мәдәниятле 74 модель иде, сайлап алу бик катлаулы булды, әмма без булдырдык. Актауга, конкурсны оештыручыларга рәхмәт, барысы да югары дәрәҗәдә үтте», - диде жюри әгъзасы Луиза Закирҗанова.
Бүләкләү тантанасы аерым категорияләрдә җиңүчеләргә бүләкләр һәм кубоклар тапшырудан башланды, шуннан соң Гран-при ияләрен атадылар. Алар арасында иң яшь катнашучылар да, өлкәнрәкләр дә бар иде. Йомгаклау көнендә конкурска килгән тамашачылар шулай ук күрше илләрдән килгән fashion-осталарның дизайнер коллекцияләре белән таныша алдылар. Ул «Төрки дөнья этномодасы» тематикасында узды.
Иң мөһиме, безнең һәрбер катнашучыбыз медальләр, мактаулы дипломнар, онытылмаслык хисләр, халыкара конкурсның бәяләп бетергесез тәҗрибәсе алды. «Бу сәфәр безгә бүләкләр генә түгел, ә илһам, яңа дуслар һәм онытылмас тәэсирләр дә бүләк итте!» - дип шәрехләде «Татар-информ» хезмәткәре Динә Хәлимова.