Татарстанда ит комбинаты директорын хезмәт хакы түләмәгәне өчен җаваплылыкка тартканнар
Татарстанның Тукай районы прокуратурасы «Чаллы-Мясо» компаниясендә тикшерү уздырган, аның нәтиҗәләре буенча оешма директоры хезмәт хакын вакытында түләмәгәне өчен җаваплылыкка тартылган.
Ачыкланганча, гыйнвардан мартка кадәр оешма хезмәткәрләренә хезмәт хакы һәм аны вакытында түләмәгән өчен компенсация түләмәгәннәр. 47 хезмәткәр алдындагы бурыч 1,8 млн сумнан артык тәшкил иткән.
Прокуратура таләбе белән «Чаллы-Мясо» компаниясе директорына карата «Хезмәт хакын түләмәү» маддәсе буенча җинаять эше кузгатылган. Моннан тыш, хокук бозуларны бетерү турында да күрсәтмәләр кертелде.
Татарстан прокуратурасы катнашы белән фирма хезмәткәрләренә 1,3 млн сумнан артык акча түләнгән.