Алабуга паркына тиеннәр кайтардылар

Алабугада «Александр бакчасы» паркында 10 тиен яши башлады. Тиеннәрне Әлмәттән кайтарганнар. Аларны шәһәрдә хайваннарны үрчетү буенча белгеч Айрат Мөхәммәтҗанов китерде. Бу хакта «Алабуга нуры» хәбәр итә.

Алар өчен йөгерү тәгәрмәчләре, оялар һәм уңайлы тормыш өчен кирәкле барлык әйберләр белән иркен вольер җиһазландырылган. Килүчеләр җәнлекләрне тыштан күзәтә ала, ләкин вольер эченә керү тыела.

Барысы 10 тиен алып кайтылган — 5 кыз һәм 5 малай. Алар инде җирле климатка җайлашкан. Җәнлекләр агрессив һәм куркыныч түгел. Аларның рационына эрбет һәм әстерхан чикләвеге, гөлҗимеш һәм көнбагыш керә, әмма кыздырылган продуктлар һәм миндаль ашату катгый тыела.

Айрат Мөхәммәтҗанов билгеләп үткәнчә, киләсе елда ук 30га якын тиен баласы да туарга мөмкин. Олы җәнлекләр вольерда калачак, ә яшь тиеннәрне паркка чыгарачаклар дип планлаштырыла.

Ә әлегә алабугалыларны һәм шәһәр кунакларын вольер янында үзләрен тыныч тотарга, тавышланмаска һәм тиеннәрне тыелган продуктлар белән ашатмаска сорыйлар.

«Безнең максат — вакыт узу белән паркның бизәге булачак тотрыклы популяция булдыру», — диде Айрат Мөхәммәтҗанов.

Хәзер алабугалыларның бу гүзәл җәнлекләрне табигый тирәлектә күзәтү мөмкинлеге бар.