«ТНВ»да «Музыкаль Сабантуй» проектының икенче сезоны булачак

«ТНВ – Яңа гасыр» телерадиокомпаниясе «Музыкаль Сабантуй» проектының икенче сезонын башлап җибәрде. Аңа әзерләнү иҗади процессының беренче шаһитлары булырга журналистларны җыйдылар. Проект авторы һәм телеканалның башкарма директоры Лилия Кадыйрова ассызыклавынча, аның чыгарылышын телевизордан сентябрь аенда карап булачак.

«Гомумән, безнең хәзер глобализация дәвере яшь буынны «йота». Олылар да егылып китеп карый торган, яшьләр өчен дә кызыклы проект ясыйсы килде. Һәм күңелдә бу «Музыкаль Сабантуй»ның концепциясе туа башлады. Мин бик күп чит илләр: мәсәлән, Казахстан һәм Төркия телевидениеләрен карыйм. Һәм анда аңа охшаш проектлар бар иде. Ләкин безгә үзебезнеке – татарныкы кирәк иде. Шунлыктан Сабантуй концепциясе – идеаль вариант дип уйладык. Бу – халыкның яратып көтеп алган бәйрәме. Проект чыгарылышын тамашачылар яңа сезонда, сентябрь ае башында карый алачак», – диде ул.

Әңгәмәдәш әйтүенчә, проектның былтыргы рейтингы югары булган.

«Мин «ТНВ – Яңа гасыр» телерадиокомпаниясе генераль директоры Илшат Әминовка рәхмәтле. Ул проект әле кәгазьдә генә килеш тә югары рейтинглы була ала. Әлбәттә, бүгенге көндә телевизон проект федераль дәрәҗәдәге каналлар күрсәткәннәрдән начар булырга тиеш түгел. Без конкуренция заманында эшлибез. Иң башта халык әлеге проектны кабул итә алуына ышанып та бетмәдем. Ә инде аннары рейтингларны карагач, мин еладым, чөнки бу хоккейныкыннан зуррак иде», – дип сөйләде ул.

Шулай ук әлеге проектның әһәмиятен Татарстанның халык артисты Рәсим Низамов та билгеләп үтте.

«Сабантуй – безнең күңелдә ярыш һәм көрәш белән ассоциацяләнә, ул татарның милли бәйрәме. Монда ул музыкаль Сабантуй буларак күзаллана. Монда өлкән буын һәм бүгенге көн артистлар көч сынаша. Кызыклы проект дип саныйм. Беренчедән, яңа форматы җәлеп итә. Мин берничә тапшыруын карап өлгердем һәм үзем дә катнашырга булдым. Дәвамлы, озын гомерле, телевизор караучылар өчен файдалы һәм зәвыклы проект булсын», – ди ул.

• Проектта булачак җырлар телерадиокомпаниянең «Болгар» радиостудиясендә яздырылды. Оештыручылар билгеләвенчә, биредә уникаль иҗади коллаборацияләр булачак – «Укытучы - укучы»: Айдар Фәйзрахманов һәм Гүзәл Уразова, Салават Фәтхетдинов һәм Рифат Зарипов кебек дуэтлар яңгыраячак.