Неймар Европага қайтмайди: “Сантос”да яна бир йил қолишга қарор қилди
Флик қаршилиги – “Барселона” имкониятини йўққа чиқарди
33 ёшли ҳужумчи ўз агентлари орқали хизматини бир неча бор “Барселона”га таклиф қилган. Аммо жамоанинг янги бош мураббийи Ханс-Дитер Флик тажрибали футболчининг ёши ва сўнгги йиллардаги жароҳатларини ҳисобга олиб, Неймарни ўз режаларига қўшмасликка қарор қилган.
“Сантос”да яна бир мавсум
TNT Sports нашрининг маълум қилишича, Неймар Европага қайтиш фикридан бутунлай воз кечган ва “Сантос” билан шартномани яна бир йилга узайтириш ниятида. Аслида футболчининг амалдаги шартномаси 2024 йил 30 июнь куни якунланиши керак эди.
Анчелоттининг қўллаб-қувватлови – мотивация сифатида
Жаҳон футболидаги яна бир янгилик – Бразилия терма жамоасига бош мураббий сифатида Карло Анчелотти тайинланиши Неймарнинг келажагига ҳам таъсир кўрсатмоқда. Анчелотти шахсан Неймар билан боғланган ва унга ишонч билдиргани хабар қилинган. Бу ҳужумчи учун қўшимча мотивация сифатида баҳоланмоқда.
Фаолиятда жароҳатлар – асосий тўсиқ
Бироқ сўнгги икки йилда Неймарнинг фаолияти жароҳатлар билан тўлиб-тошган. Январ ойида “Сантос”га қайтганидан бери у жами тўққизта учрашувда майдонга тушган, учта гол урган ва учта ассист қайд этган. Охирги марта 17 апрель куни майдонга тушган футболчи яна жароҳат олиб, сўнгги бир ойни тикланиш билан ўтказмоқда.
Zamin.uz таҳририятидан:
Неймарнинг келгуси фаолияти ҳозирча Бразилияда давом этади. 2026 йилда бўлиб ўтадиган жаҳон чемпионатида у терма жамоа етакчиси сифатида майдонга тушиши мумкинми — бу унинг саломатлиги ва формасига боғлиқ. Ҳозирча эса у “Сантос” билан қайта тикланиш сари қадам ташлаяпти.
Сиз Неймарнинг қарорини қандай баҳолайсиз? У яна юқори даражага қайта оладими?