Төзелештә эшче үлү сәбәпле, Казан эшмәкәренә суд булачак
Казанда шәхси эшмәкәр хезмәтне саклау таләпләрен бозган өчен суд каршына басачак. Бу хакта Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итә.
Фаҗига узган елның 10 сентябрендә булган. Эшче төзелә торган торак комплексның 13нче катыннан егылып төшә һәм һәлак була.
Тикшерү мәгълүматлары буенча, фаҗига эшмәкәрнең төзүчене иминлек техникасы таләпләренә туры килә торган иминият системасы белән тәэмин итмәве аркасында килеп чыккан. Җинаять эше судка җибәрелгән.