ნიკა გვარამია: ხელისუფლებას მოუწევს ოპოზიციის გამარჯვების აღიარება

"კოალიცია ცვლილებებისთვის", რომელიც სამ ოპოზიციურ პარტიას აერთიანებს, არ აპირებს ცენტრალური საარჩევნო კომისიის მიერ გამოქვეყნებული შედეგების აღიარებას და საპარლამენტო არჩევნების გაყალბების მასშტაბური სქემის არსებობაზე საუბრობს. ამ კოალიციაში შემავალი პარტია "ახლის" თანადამფუძნებლის, ნიკა გვარამიას თქმით, "ქართული ოცნება" ხელისუფლების უზურპაციას ცდილობს, თუმცა ოპოზიცია მზად არის, დაიცვას ამომრჩევლების ხმები.


"ხელისუფლების უზურპაცია მოხდა საქართველოში, ეს არის სახელმწიფო გადატრიალება. "ქართული ოცნება" არის საკონსტიტუციო გადატრიალების ავტორი და ამაზე "ქართული ოცნება" აგებს პასუხს აუცილებლად იმ წესით, როგორი წესითაც ამას ითვალისწინებს საქართველოს კანონმდებლობა. მაგრამ, ვიდრე ეს მოხდება, "ქართულ ოცნებას" მოუწევს ოპოზიციის გამარჯვების აღიარება. ჩვენ გაშიფრული გვაქვს სქემა, რომლის მიხედვითაც მათ მოიპარეს არჩევნები. ამაზეც გვჭირდებოდა გარკვეულწილად დრო და ამაზე საუბარი. ეს არ არის მარტივი, ჩვენ დაგპირდით ხმების დაცვას და ბოდიშს გიხდით, რომ ამ რთული ტექნოლოგიური სქემის გაშიფვრაში იმთავითვე წარმატებული არ ვიყავით და მხოლოდ არჩევნების გაყალბების შემდეგ აღმოვაჩინეთ ეს პრობლემა", - თქვა ნიკა გვარამიამ არჩევნების წინასწარი შედეგების გამოცხადებიდან 2 საათის შემდეგ გამართულ ბრიფინგზე.


მან ისაუბრა "მთავარი არხისა" და "ფორმულის" დაკვეთით ჩატარებულ ორ დამოუკიდებელ ეგზიტპოლზეც, რომელთა შედეგების მიხედვით, ოპოზიციას ჯამში უფრო მეტი ხმა აქვს მიღებული, ვიდრე "ქართულ ოცნებას" და თქვა, რომ ორივე საერთაშორისო კომპანია მზად არის, გაიაროს აუდიტი მათი შედეგების სანდოობის დასამტკიცებლად.


"შევახსენებ ყველას და შევახსენებ კვლავ ბიძინა ივანიშვილს - მას აქვს ბოლო შანსი ან შეიძლება უკვე ჰქონდა ბოლო შანსი, რომ ისტორიაში ჩაწერილიყო ოდნავ მაინც პოზიტიური რაკურსით და ხელისუფლების მშვიდობიანი გადაბარება ეღიარებინა. რაკიღა მან ეს არ გააკეთა, ჩვენ გვაქვს ჩვენი გადაწყვეტილებები, ჩვენ გვაქვს ჩვენი გზა და ჩვენ ვესაუბრებით უკვე ქართველ ხალხს. აღარ ვესაუბრებით ხელისუფლებას, აღარ ვესაუბრებით არავის სხვას", - თქვა ნიკა გვარამიამ.


მედიასთან არჩევნების წინასწარი შედეგების შესახებ ისაუბრა ნიკა მელიამაც, პარტია "ახლიდან". მან თქვა, რომ ბრძოლა გრძელდება და სიმართლე ოპოზიციის მხარესაა. მას დაუჯერებლად მიაჩნია მმართველი პარტიის ამომრჩეველთა ასობით ათასი ადამიანით ზრდა და რეგიონებში "ქართული ოცნების" 90%-იანი რეიტინგი.


"ფაქტია, რომ ივანიშვილმა არჩევნები არ ჩაატარა. ამ არჩევნების ცნობა, ამ არჩევნების აღიარება ეს იგივეა, რომ ქედი მოუხარო რუსეთის ფედერაციას. ეს არ იყო ქართველი ხალხის ნების გამოხატულების შესაძლებლობა და ასპარეზი", - თქვა მან.


ცნობილია, რომ არჩევნების შედეგების აღიარებას არ აპირებს არც "ერთიანი ნაციონალური მოძრაობის" ირგვლივ შექმნილი პოლიტიკური გაერთიანება.


 




22 საათისთვის ცენტრალურმა საარჩევნო კომისიამ 3 111 საარჩევნო უბნიდან 2 251-ის ელექტრონულად დათვლილი წინასწარი შედეგები გამოაქვეყნა. ამ შედეგების თანახმად, „ქართულმა ოცნებამ“ ხმათა 53.064% დააგროვა.