Путин «Россиянең атказанган сайлау системасы хезмәткәре» мактаулы исемен гамәлгә куйды

РФ Президенты Владимир Путин үзенең указы белән «Россия Федерациясенең атказанган сайлау системасы хезмәткәре» дигән мактаулы исемне гамәлгә куйды. Шул хактагы документ хокукый актлар порталында урнаштырылган.

Хәзер илдә мактаулы исемнәрнең гомуми саны 70кә җитте. Мактаулы исемнәр дәүләт бүләкләре системасына керә һәм гражданнарны төрле өлкәләрдәге хезмәтләре өчен бүләкләүнең бер формасы санала.

Әлеге указ белән шулай ук яңа исем турындагы нигезләмә дә расланды. Ул сайлаулар һәм референдумнар үткәрүдә, сайлау системасын үстерүдә, сайлаучыларның хокукый культурасын күтәрүдә, сайлау хокукларын тәэмин итү һәм саклауда һәм «һөнәри эшчәнлектә башка мөһим нәтиҗәләргә» ирешүдә шәхси хезмәтләре өчен Үзәк сайлау комиссиясе һәм хәлиткеч тавыш хокукына ия башка сайлау комиссияләре әгъзаларына, шулай ук сайлау комиссияләренең башка хезмәткәрләренә тапшырылырга мөмкин.

Элегрәк РФ Иҗтимагый палатасында сайлау системасы хезмәткәрләре өчен мактаулы исем булдырырга тәкъдим иткән иде. Идея авторлары сайлау комиссиясе әгъзаларының илнең яңа төбәкләрендә атышлар вакытында эшләвен дәлил итеп күрсәтте, дип хәбәр итә ТАСС агентлыгы.