Авыл хуҗалыгы министрлыгы ашлык җитештерү кимү турында: Ел бик авыр булды

Эссегә һәм корылыкка карамастан, Татарстан быел 3,7 млн тоннага якын ашлык җыйды, уртача уңыш гектардан 26 центнер тәшкил итте. Бу хакта «Татар-информ»га Дәүләт статистикасы федераль хезмәтенең иген җитештерүнең 30 проценка кимүе турында мәгълүматына комментарий биреп, Татарстан Авыл хуҗалыгы һәм азык-төлек министрлыгы матбугат хезмәтеннән хәбәр иттеләр.

Бу ел аграрийлар өчен шактый катлаулы булды: башта республиканың көнчыгышында май аенда температура минус 12 градуска кадәр төшеп, кыраулар күзәтелде, ә аннары корылык башланды. Барлыгы 90 мм яңгыр яуды, ул — норманың яртысыннан да кимрәк. Кайбер районнарда яңгыр җәй буе диярлек яумады.

Шуңа карамастан, берничә районда бөртеклеләрнең уңышы республиканың уртача күрсәткеченнән артып китте. Мәсәлән, Тәтеш, Чүпрәле, Кукмара, Кама Тамагы районнарында бер гектардан 35 центнердан артык уңыш алынган.

Бөртеклеләрне җыюда югары күрсәткечләргә ирешү өчен Татарстанда сыйфатлы орлыклар кулланылды, туфрак дөрес итеп әзерләнде һәм вакытында эшкәртелде, җитәрлек күләмдә минераль ашлама кертелде, дип аңлаттылар матбугат хезмәтендә.

Моннан тыш, игенчелектә җитештерүчәнлекне арттыруда дәүләт программалары һәм шәхси инвестицияләр хисабына тармакка ярдәм мөһим роль уйный.

Дәүләт статистикасы федераль хезмәте докладында әйтелгәнчә, 2023 елның 1 ноябренә Татарстанда 3,7 млн тоннадан артык ашлык, шул исәптән кукуруз җитештерелгән. Бу — узган елның шул ук датасына караганда 31,1 процентка кимрәк.