Беренче канал татар туе трында чыгарылышны кабат күрсәтәчәк
3 декабрьдә, 10.15 сәгатьтә, тамашачылар татар милли туена багышланган «Играем свадьбу» программасының чыгарылышын кабат карый алачак.
Казанда яшәүче Сәйдә һәм Фәрит аның геройлары була. Яшьләр Татарстандагы туй йолалары нигезендә өйләнешергә карар кылган һәм алып баручылар алар белән бергә татар мәдәниятен өйрәнә. Тамашачылар туйга чәкчәк әзерләү серләрен һәм туй мендәре өчен ничә каз йолкырга икәнен беләчәк.
Бүгенге көндә «Играем свадьбу» документаль фильмнар циклы авторлары Архангельск, удмурт, карел һәм казак туен тәкъдим итте.
- 2024 ел Россиядә Гаилә елы булачак. РФ Президенты Владимир Путин 22 ноябрьдә шул хактагы указны имзалады. Әлеге карар гаиләне яклау өлкәсендә дәүләт сәясәтен популярлаштыру һәм традицион кыйммәтләрне саклау максатыннан кабул ителде, диелә документта.
- 2023 ел Татарстанда Милли мәдәниятләр һәм гореф-гадәтләр елы дип игълан ителде. ТР Рәисе Рөстәм Миңнеханов республиканың үзенчәлеген саклауда аның зур әһәмиятен билгеләп үтте.