Të shtëna masive në SHBA: Dy të vrarë, 28 të lënduar, tre në gjendje kritike
Agjencia e lajmeve AP raporton se tre persona janë në gjendje kritike, pas sulmit të bërë në mëngjesin e 2 korrikut.
Komisionari në detyrë i Departamentit të Policisë në Baltimore, Richard Worley, konfirmoi numrin e të vdekurve dhe të plagosurve gjatë një konference për media në vendin e ngjarjes.
Një 18-vjeçare dhe një 20-vjeçar janë gjetur të vdekur në vendin ku u krye sulmi, raporton AFP duke cituar një deklaratë të policisë.
Dhjetë persona u dërguan në spitale nga policia dhe 19 të tjerë shkuan vetë, raportoi Fox 45, duke shtuar se një dëshmitar tha se dëgjoi 20 deri në 30 të shtëna me armë.
Të shtënat ndodhën rreth 12:30 të mëngjesit, sipas kohës lokale, në një festë në zonën e Brooklyn Homes të Baltimores Jugore, tha Worley.
“Dua që ata që janë përgjegjës të më dëgjojnë dhe të më dëgjojnë shumë qartë”, tha kryetari i Baltimore, Brandon Scott. “Ne nuk do të ndalemi derisa t'ju gjejmë dhe do t'ju gjejmë. Deri atëherë, shpresoj që çdo frymë që merrni, të mendoni për jetët që keni marrë”.
Siç raporton AP, autoritetet bënë të ditur se ende nuk ka të arrestuar për këto të shtëna. Scott i kërkoi kujtdo që ka informacion t'i ndihmojë hetuesit të gjejnë “frikacakët” që ishin përgjegjës për të shtënat.
Arkivi i Dhunës me Armë (GVA) përkufizon "të shtënat masive" si një incident me armë, në të cilin katër ose më shumë njerëz janë plagosur ose vrarë.
Me më shumë armë zjarri sesa banorë, në SHBA është raportuar për të paktën 44.357 të vrarë nga armët e zjarrit në vitin 2022, përfshirë 24.090 vetëvrasje, sipas GVA-së.
Sipas FBI-së, në SHBA ka pasur 345 incidente të tilla në periudhën 2000-2020, të cilat kanë rezultuar me mbi 1.000 njerëz të vrarë dhe mbi 1.800 të plagosur.
Sulmi më vdekjeprurës i tillë - në Las Vegas në vitin 2017 - ka lënë më shumë se 50 njerëz të vrarë dhe mbi 500 të plagosur.