Aşgabadyň gijeki klublarynda polisiýa reýd geçirdi
Hepdäniň dowamynda "Hoşal", "Aşgabat", "Paytagt", "Lemon" ýaly birnäçe klubda reýd geçirildi. Azatlygyň Aşgabatdaky habarçysynyň we çeşmeleriniň maglumatlaryna görä, barlaglar 24-nji maýda başlandyr. Polisiýa we gözegçilik edaralary özleriniň "ýokardaky buýruklara" laýyklykda hereket edýändiklerini aýdypdyr.
Bu aralykda çäklendirmeler azyk ugrundan iş alyp barýan kärhanalara hem degişli boldy. Kafeler, azyk dükanlary we azyk önümleri bilen üpjün edýän hyzmatlara agşam sagat 9-dan soň işlemek gadagan edildi.
Çeşmeler, bu çäklendirmeleriň hepdäniň ahyryna çenli dowam etjegini aýtdylar.
Barlaglaryň sebäbi entek aýdyňlaşdyrylmady. Gijeki klublara edilen reýdler we restoranlara we kafelere girizilen çäklendirmeler orta mekdepleriň soňky jaň dabarasyna we uçurymlara mekdebi gutardyş dabarasyny bellemegiň gadagan edilmegine gabat geldi. 25-nji maýda mekdebi gutardyş dabarasy Aşgabat gününe hem gabat geldi.
Azatlyk Radiosynyň habarçylary uçurymlaryň gutardyş dabarasyny bellemezlikleri üçin 25-nji maýda kafelere we restoranlara ýaşlary kabul etmegiň gadagan edilendigini habar berdiler. Şol gün diskotekalar hem ýapyldy.
Bu ýylky soňky jaň dabaralary berk çäklendirmeler we howpsuzlyk çäreleriň berjaý edilmegi bilen geçirildi. Polisiýa Aşgabadyň köçelerinde patrullyk etdi. Polisiýa awtoulagly köçelerde aýlandy, polisiýa toparlary ýollarda awtoulaglary saklap, barlady, şäheriň ýaşaýjylaryna agşam sagat 9-dan soň köçä çykmagyň gadagandygy barada duýduryş berildi. Häkimiýetleriň aýratyn ünsi şäher seýilgählerine hem gönükdirildi. Bäş aýak ýadygärligiň ýerleşýän seýilgähi, Aşgabat seýilgähi we beýlekiler polisiýanyň gözegçiligi astynda boldy.
"Agşam 10-dan soň köçelerde hiç kim diýen ýaly ýokdy. Ýollarda wagtal-wagtal ýük ulaglaryny ýa-da ýörite belgili awtoulaglary görmek bolýardy" - diýip anonim gürleşen çeşme aýtdy.
Habarçylar bu çärelerde esasy ünsüň ýaşlara gönükdirilendigini olara şäherden çykýan ýollarda hem gözegçilik edilendigini aýtdylar. Şeýlelik bilen, okuwyň gutarandygyny şäheriniň daşynda bellemäge synanyşan ýaşlar hem öz planlaryny ýerine ýetirip bilmediler.
Bu aralykda, ýaşlar bilen baglanyşykly birnäçe heläkçilik barada belli boldy. Habarçylaryň maglumatlaryna görä, hadysalaryň birinde bilim edaralarynyň biriniň uçurymy awtoulag sürüp barýarka uklap, heläkçilige uçrapdyr, beýlekisinde mekdep okuwçylarynyň bir topary derman serişdeleriniň ulanylmagy zerarly keselhana düşüpdir.
Mundan öň mekdeplerde ýaşlara okuwyň gutarmagyna degişli dabaralara gatnaşmak gadagan edilipdi.
Rus dilinde hem okaň
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.