Татарстанда басуларны эшкәрткәннән соң бал кортлары үлгән умартачы судта җиңде
Арча район суды Шәке авылыннан булган умартачы Нурулла Закиров файдасына карар чыгарды. Ул «Северный» авыл хуҗалыгы предприятиесе белән узган елның июлендә кырларны химик матдәләр белән эшкәрткәннән соң бал кортлары үлү сәбәпле судлашты, дип хәбәр итә Татарстан Авыл хуҗалыгы һәм азык-төлек министрлыгының матбугат хезмәте.
«Хәзер Нурулла Закиров зыян өчен компенсация ала алачак, – дип билгеләп үттеләр матбугат хезмәтендә. – Министрлык агротехник эшләрне башкарганда барлык инструкцияләрне һәм таләпләрне төгәл үтәргә киңәш итә».
Бал кортлары агулану билгеләре барлыкка килсә һәм билгеләнгән кагыйдәләрне бозу очраклары ачыклаганда, ведомствода район авыл хуҗалыгы һәм азык-төлек идарәләренә хәбәр итәргә киңәш итәләр.
Татарстанда бал кортларының пестицидлар белән агуланудан үлүенә юл куймау эше алып барыла. Аерым алганда, агрономнарны һәм хуҗалык җитәкчеләрен майлы культуралар үстерүнең куркынычсыз технологияләрен куллану буенча укыту үткәрелде.