Дума «Россиянең дошманы тарафыннан җитештерелгән» дигән маркировка кертергә тәкъдим итә

Безгә дус булмаган илләрдән китерелгән товарларны «Россиянең дошманы тарафыннан җитештерелгән» дигән сүзләр белән маркировкалый башларга кирәк. Бу хакта РИА Новости агентлыгы Дәүләт Думасының оборона комитеты рәисенең беренче урынбасары, «Родина» партиясе лидеры Алексей Журавлевка сылтама белән хәбәр итә.

«Көнбатышның күп кенә компанияләре, Россиядән китүләре турында формаль рәвештә игълан итсәләр дә, барыбер теге яки бу рәвештә бездә үз продукциясен сатарга тырыша. Мондый товарларны «Россиянең дошманы тарафыннан җитештерелгән» дип маркировкаларга, өстәвенә моны зур шрифт белән һәм иң күренә торган урында язып куярга кирәк. Шул рәвешле, сатып алучы, үз акчасын биреп, дошманны финанславын белеп торсын», - дип хәбәр итте Журавлев.

Аның сүзләренчә, бу шактый зур базар.

Моннан тыш, Россиядән китүчеләрнең күбесе «хәзер башка исем белән акрынлап кире кайта башлады», дип искәртте депутат.

«Мондый экспансиягә игътибар итмәү акылсызлык булыр иде – илне халык алдында гаепләп, компанияләр анда акча эшләвен дәвам итә», - дип өстәде Журавлев.

Бу вазгыять бернинди кысаларга да сыймый, дип сүзен төгәлләде ул.