Володин салымнан качучыларның акчаларын хәрбиләр һәм мәктәпләргә тотарга тәкъдим итә
Дәүләт Думасы спикеры Вячеслав Володин үзенең 1 Май котлавында салым түләүдән качуда гаепләнгән блогерларны тоткарлауга карата үз фикерен белдерде Социаль челтәрләрдә кешеләрнең ышанычыннан акча эшләп, алдау схемаларын кулланган һәркемнән ул социаль ихтыяҗларга – учреждениеләрне ремонтлауга һәм хәрбиләргә һәм аларның гаиләләренә ярдәм итүгә акча җыярга тәкъдим итте.
1 Май - Хезмәт бәйрәме, «үз хезмәтләре белән илебез үсешенә, аның икътисадын ныгытуга өлеш керткән һәркемгә хөрмәт символы», - дип искәртте Дәүләт Думасы спикеры.
«Заманча технологияләр үсеше белән яңа һөнәрләр, мөмкинлекләр барлыкка килде, әмма шул ук вакытта законны урап узу һәм гражданнар хисабына баюның яңа ысуллары да табылды. Кешеләрнең ышанычыннан зур байлык ясап, кайберәүләр салым түләмәү өчен мошенниклык схемаларын куллана. Сүз зур суммалар турында бара: миллионнан миллиардка кадәр. Вакыт күрсәткәнчә, бу еш кына социаль челтәрләрне үзләштерү аша яшәргә өйрәтергә тырышучылар», - дип язган ул үзенең телеграм-каналында.
Мондый очраклар федераль салым хезмәте контролендә булырга тиеш, дип искәртте Володин. Ул хәзерге вакытны «хакыйкать мизгеле» дип атады, бүген һәркем ил үсеше өчен барысын да эшләргә тиеш, дип белдерде.
«Түләтелгән акча мәктәпләрне, хастаханәләрне ремонтлауга, кешеләрнең проблемаларын хәл итүгә, безнең солдатларга һәм офицерларга, аларның гаиләләренә ярдәм итүгә тотылырга тиеш. Кемгә күп бирелә, аңардан шулкадәр күбрәк сорала да», - дип билгеләп үтте ул, бәйрәм белән «намуслы хезмәт итүчеләрне» котлап.
Исегезгә төшерәбез, 27 апрельдә блогер, «Теләкләр марафоны» авторы Елена Блиновскаяның тоткарлануы турында билгеле булды . Аңа карата 918 млн сум салым түләмәү турында эш кузгатылган. Элегрәк 311 млн сумлык салымнан качуда блогерлар Валерия Чекалинаны (Лерчек псевдонимы белән күбрәк билгеле), Александра Митрошинаны гаепле дип таптылар. Бюджетка 130 млн сум керткәннән соң, Митрошинага карата дәгъвалар алынган.
Массакүләм матбугат чаралары һәм телеграм-каналлар салым түләмәүчеләр исемлеге барлыгын хәбәр итә. Анда 30дан артык кеше кергән. Алар арасында Инстасамка, Регина Тодоренко, Егор Крид һәм башкалар бар.