Guide fekk 20.000 kroner i bot for å forstyrra isbjørn på Svalbard
Sysselmestaren på Svalbard har gjeve ein utanlandsk guide eit førelegg på 20.000 kroner for å forstyrra ein isbjørn i Trygghamna førre lørdag, skriv Sysselmestaren i ei pressemelding.
Guiden var ansvarleg for ei gruppe med kajakkpadlarar som padla mot ein isbjørn som låg i ro på land ved Trygghamna ytterst i Isfjorden. Kajakkfølget følgte etter isbjørnen, medan bjørnen gjentekne gonger reiste seg og la seg ned ein ny stad.
– Det er straffbart å lokka til seg, forfølga eller ved anna aktiv handling oppsøka isbjørn slik at han blir forstyrra eller at det oppstår fare for menneske eller isbjørn, opplyser politiadvokat Magnus Rindal Fredriksen hos Sysselmesteren.
Hendinga blei observert av Sysselmestaren sin feltinspektør i nærleiken, fortel Fredriksen.