Вирус или паразит - Од што заболеле децата во Гевгелија?

Дали се работи за вирус или за некој вид на паразит кај децата во гевгелиската болница истражува екипа од Универзитетската детска клиника од Скопје. Екипата работи на утврдување на причината од што заболеле педесетина деца и бебиња од Гевгелија кај кои имало респираторни проблеми нетипични за овој период од годината. Лекарскиот тим е предводен од доктор Аспазија Софијанова.


„Не само во овој регион, туку и во други градови има зголемен број на деца со горнореспираторна симптоматологија. Доаѓаме со комплетна опрема за да земеме цел респираторен панел и точно да утврдите дали се работи за вирус, мутација на вирус или некој вид на паразит но тоа ќе го знаеме откако ќе направиме прелиминарен увид во клиничката слика на дечињата, во дијагностиката што ја носиме со себе и дијагностиката што вчера ја направиле колегите од Гевгелија“, рече Софијанова.



Директорот на болницата во Гевгелија, Митко Крџев рече дека моментно се хоспитализирани само две дечиња на одделението во гевгелиската болница, мал дел биле препратени во Скопје и дека 20 дечиња се на терапија, но не се задржани во болницата.



Изминатиов месец 50 деца и бебиња донесени во болницата во Гевгелија со респираторни инфекции


Министерот за здравство Венко Филипче рече дека болните деца во Гевгелија се негативни на ковид-19.



Во текот на вчерашниот ден Министерството за здравство соопшти дека вкупно 50 деца и бебиња од Гевгелија во изминатиов месец побарале лекарска помош во локалната општа болница, со респираторна инфекција која не е типична за овој период од годината.