Yaltada evlerni kene suv bastı – akimiyet
«Tekrar suv basuvları aqqında muracaatlar keldi, aralarında Sverdlov soq., 32 (13-ünci korpus) çoq qatlı evniñ mağazı. Vergasov soqağında da evlerni suv basa – anda bentler qoyuldı, suv seviyesi arttı, aqım küçü arttı. Fevqulâde vaziyetler nazirliginiñ ekskavatorı ve qurtarıcılar çalışa», – dep aytıla haberde.
Fevqulâde vaziyetler nazirliginiñ malümatına köre, (Krivoştı ve Kiyevskaya soqaqlarınıñ) çoq qatlı mesken evleriniñ üç laylı ve (Vergasov, Cafer-Seydamet soqaqları, Yujnoberejnoye şosse) topraq qapatqan yedi mağaznı temizlemek kerek.
İyülniñ 8-nde Qırım ve Aqyarda furtuna ihtarı ilân etildi.
Bundan evel Qırımnıñ Rusiye Fevqulâde vaziyetler nazirliginiñ idaresi 2021 senesi iyünniñ 16-ndan 18-ne qadar küçlü yağanaqlar sebebinden Yaltada ve şarqiy Qırımda 426 azbarnı, 356 evni, 18 içtimaiy ceetten müim obyektni suv bastı, dep bildirgen edi. Umumen suv basqan yerlerden 1783 kişi tahliye etildi.