Kuleba: «Qara deñizniñ Azaq deñiziniñ taqdirini tekrarlamaması müimdir»
«NATO-ğa Qara deñizde er şey olğanı kibi qalsa, Rusiye onı nezaret etecek ve tesirini arrtıracaq, dep açıqtan-açıq aytamız. Ticaret yolları üzerinde nezaretni keñleştirecek ve bölge içün daimiy bir telüke yaratacaq. NATO-nıñ cevap bergenini köremiz. Az-az, amma tam Qara deñiz içün siyaset elemetnleri peyda ola», – dedi Kuleba.
O, Ukrainanıñ Qırım ve Qara deñizdeki gemiler qatnavı mevzusı daima köz ögünde tutmağa tırışqanına diqaqat çekti.
«İttifaqnıñ azaları ile laqırdı vaqtında Qara deñiz mevzusını daima köteremiz. Bu em bölgede – Romaniya, Türkiye, Bulğaristan ile – em de NATO ştab-kvartirasında. Çünki şimdi Rusiyeniñ işğal etilgen Qırımda bulunğanı pek elverişlidir. Qara deñiz Azaq deñiziniñ taqdirini tekrarlamaması biz içün müimdir», – dep qoştı o.
Tbiliside ziyaretnen bulunğan NATO Baş kâtibiniñ Cenübiy Kavkaz ve Merkeziy Asiya meseleleriden mahsus temsilcisi Ceyms Appaturay, ittifaq Qara deñizde bulunuvını devam etecegini ve bu bölgede ortaqlarınen işbirlikni pekitecegini bildirdi.
OSCE-de ABD-niñ meselelerinde muvaqqat vekâletlisi Kortni Ostrian, Rusiyeniñ işğal etilgen Qırım yaqınlarında Qara ve Azaq deñizlerinde gemiler qatnavını sıñırlağanından raatsızlıq bildirdi.
Hatırlatamız, NATO Rusiyeniñ Qara deñizdeki sıñırlavlarını takbih etti ve Qırımnıñ arbiyleştirilüvi aqqında hatırlattı.
Evel, Avropa Birligi, Rusiyeniñ Qara deñizdeki areketlerinden raatsız olğanını bildirdi.
İyülniñ 1-nde Rusiye prezidenti Vdadimir Putin imzalağan bir qanun yayınlandı. Oña köre, Rusiye gvardiyası ve arbitsleri qanunsız keçüv ıntıluvlarınıñ qarşısını almaq içün qorunğan obyektlerniñ territoriyalarını ve suvlarını blok etmege ruhset berile. Keriç boğazı akvatoriyası ve Qırım ile Rusiye energokoprüniñ suvları da Rusiye Gvardiyasınıñ nezareti altında.