Олмаотада Шинжондаги қариндошлари озод этилишини талаб қилганлар ҳибсга олинди
1 июль куни эрталаб фаол Байбўлат Кунбўлатули ва унинг онаси Зауатхан Турсинди ўз уйида қамоққа олинган. Бундан ташқари Хитой консулхонаси олдида 140 кундан бери намойиш ўтказиб келган бошқа фаоллар ҳам қамқоққа олинган.
Хитой консулхонаси олдида намойиш ўтказиб келаётган фаоллар Хитой Коммунистик партиясининг 100 йиллиги Пекинда расман нишонланаётган бир пайтда ушланди.
Фаоллар ўзларининг қамоққа олинишини айнан мана шу сана билан боғламоқда.
Олмаотадаги Хитой консуллиги олдида яқинлари Шинжондаги қамоқларда сақланаётган қозоғистонликлар 140 кундан бери норозилик акциясини ўтказиб келмоқда. Шу кунгача Хитой томони бу норозиликка муносабат билдирмади.
Халқаро ҳамжамият бир неча йилдан бери Хитойни Шинжондаги уйғурлар ва бошқа мусулмон миллатларни ҳеч қандай асосларсиз таъқиб қилиб келаётганликда айблайди.
АҚШ Давлат департаменти диний эркинликлар бўйича йиллик ҳисоботида Хитойни мусулмон уйғурлар ва бошқа диний озчиликларга қарши “геноцид” содир этганликда айблади.