Чаллыда Сабан туе гүзәлен сайлыйлар

(Чаллы, 16 июнь, «Татар-информ», Гөлназ Хәбибуллина). Әлеге минутларда Чаллының «Энергетик» мәдәният сараенда «Сабан туе гүзәле — 2021» бәйгесенең финалы бара. Чаллыда әлеге шәһәркүләм бәйге 1993 елдан бирле уздырыла. 

Бәйгенең сайлап алу турында 15 яшьтән 26 яшькә кадәр кызлар катнашты. Бүген «Сабан туе гүзәле» титулы өчен финалга чыккан ун кыз көч сынаша. Иң яшь катнашучыга — 16 яшь. Ул — 54нче гимназия укучысы Алия Авзалова. 

Кызлар бәйгенең финалына җитди әзерләнгәннәр. Алар белән вокал, хореография, сәхнә сөйләме, матур йөрү сәнгате буенча педагоглар, режиссер, модельерлар эшләгән.

Бәйге традицион «Татар кызы» гимны белән башланды.

Кызлар «Болгар» бию ансамбле егетләре белән парлы бию башкардылар. Һәр катнашучы турында кыскача белешмә бирелде. Экранда кызларның шәһәр тарихын өйрәнүе, төрле мәдәният һәм сәнгать оешмаларында булып, сәнгать эшлеклеләре, язучылар белән очрашканы күрсәтелде. 

Алга таба жюри һәм тамашачы кызларның сәхнә осталыгын бәяли ала. Алар татар халкының танылган хатын-кызлары образына кереп, үзләре турында биографик фактлар белән таныштырачак. Шулай ук кызларның милли кием коллекциясен күрсәтүләре һәм иҗади чыгышлары көтелә. 

«Сабан туе гүзәле» шәһәр бәйгесе, елдагыча милли бәйрәм — Сабантуй алдыннан уза. Аның максаты — туган телебезне һәм халкыбызның милли традицияләрен саклап калу һәм популярлаштыру.