Фәрит Мөхәммәтшин Дәүләт Советында 14 җәмәгать судьясына таныклык тапшырды

(Казан, 16 июнь, «Татар-информ»). Татарстан Дәүләт Советы Рәисе Фәрит Мөхәммәтшин бүген җәмәгать судьяларына таныклыклар тапшырды. Документларны республиканың төрле районнарындагы суд участокларын тәкъдим итүче 14 җәмәгать судьясы алды, дип хәбәр итә ТР парламенты матбугат хезмәте.

 «Бүген дөнья юстициясе бәхәсләрне нәтиҗәле хәл итү механизмын, гадел хөкем ролен генә үтәп калмый, шулай ук җәмгыятьтә конфликт һәм халык кәефенең сизгер барометры булып тора», — диде Фәрит Мөхәммәтшин.

 Ул Татарстанда 190 җәмәгать судьясы үз вәкаләтләрен башкаруын искәртте. Узган ел алар 700 меңгә якын эш һәм материал тикшергән, бу алдагы ел белән чагыштырганда 16 процентка күбрәк.

Парламент башлыгы республика җитәкчелеге гадел хөкем өчен шартлар тудыруга зур игътибар бирүен искәртте. Аның сүзләренчә, «2014 — 2023 елларга Татарстан Республикасында юстицияне үстерү» дәүләт программасы буенча җәмәгать судьялары эшли торган 37 бина капиталь ремонт үткәрелгән. Ә якындагы өч елда республика бюджетыннан җәмәгать судьялары биналарын капиталь ремонтлауга өстәмә рәвештә 146 млн сум бүлеп биреләчәк.

 «Быел федераль бюджеттан җәмәгать судьялары участокларында якланган элемтә каналларын булдыруга 30 млн сум акча бирелгән, бу дәүләт органнары белән хезмәттәшлек сыйфатын арттырачак, гражданнарның видеоконференция элемтә ярдәмендә суд утырышларында катнашу мөмкинлеген оештырырга ярдәм итәчәк. Татар телен суд производствосында куллануны киңәйтү өчен кыска вакытлы курслар оештырылды», - диде ул.

 «Җәмәгать судьяларының эшчәнлеге һәм аларны хәл итү турыдан-туры йөзләгән кеше язмышы, тормышның төрле өлкәләрендә бәхәсләрне җайга салу белән бәйле», - дип өстәде Фәрит Мөхәммәтшин. «Шуңа күрә гражданнарның судьялар эшенә, аларның мораль һәм әхлакый йөзенә карата таләпләре бик югары. Кешеләрнең судның дөрес булуын аңлавы мөһим. Кешеләр судка хакимияткә ышанган кебек ышанырга тиеш», — диде ул.