«Բժիշկները սկզբի օրերին ասում էին՝ հույս չկա, որ կապրի…այդպիսի վնասվածքով հազարից մեկն է ողջ մնում»
«Ալեքսը շատ աշխատասեր, աշխույժ, էներգիայով լի երիտասարդ էր մինչև արցախյան պատերազմում ծանր վիրավորվելը: Նա մինչև բանակ գնալը շատ էր աշխատում, երևի դա էլ նրան ուժ է տալիս պայքարելու իր ցավերի դեմ: Ինքը շատ լուրջ տղա էր, միշտ չէ, որ Ալեքսին կարող էիր ծիծաղելով տեսնել, բնավորությամբ շատ տաքարյուն է»,- ԳԱԼԱ-ի հետ զրույցում պատմում է արցախյան պատերազմում ծանր վիրավորում ստացած ժամկետային զինծառայող Ալեքս Աղաջանյանի հորաքրոջ դուստրը՝ Անժելիկա Բեգլարյանը:
Անժելիկան պատմում է, որ Ալեքսի մոտ հայրենասիրությունը փոխանցվել է ժառանգաբար.
«Ալեքսն էլ իր հոր նման կռվել է, քեռիս մասնակցել է և՛ արցախյան առաջին պատերազմին, և՛ ապրիլյան քառօրյա պատերազմին: Արցախյան պատերազմում ձեռքից վիրավորվել է և ստացել կոնտուզիա:
Ալեքսն ու իր նման տղերքը արժանի են ամեն տեսակ հարգանքի ու խոնարհման, որովհետև իրենք չեն փախել, իրենք կռվել են:
Ալեքսը ծառայում էր Արցախում, ինքը վարորդ էր, բայց սեպտեմբերի 27-ից մասնակցել է թեժ մարտերին: Հոկտեմբերի երեքին վիրավորվեց եղբայրս։ Մտերիմ ընկերոջ հետ էր, ապա եղբորս տարել են ուրիշ դիրք։ Ալեքսը գանգուղեղային ծանր վիրավորում է ստացել:
Բժիշկները սկզբի օրերին ասում էին՝ հույս չկա, որ կապրի… հետո կամաց-կամաց դրական տեղաշարժ կար, հիմա հասավ նորմայի, այդպիսի վնասվածքով հազարից մեկն է ողջ մնում:
Այս պահին Երևանում վերականգնողական բուժում է ստանում, ոչ կարողանում է խոսել, ոչ կարողանում է քայլել»,- շարունակում է Անժելիկան:
Նրա խոսքերով՝ այս պահին միայն Ալեքսի առողջության մասին են մտածում:
Ալեքս Աղաջանյանը ժամկետային զինծառայող է, ծառայել է Հադրութում, մասնակցել թեժ մարտերին, հունվարի 14-ին պիտի զորացրվեր:
Ալեքսը ծնվել է Քաշաթաղի շրջանի Վարդուտ գյուղում, որը հակառակորդի վերահսկողության տակ է:
Անահիտ Չալիկյան
The post «Բժիշկները սկզբի օրերին ասում էին՝ հույս չկա, որ կապրի…այդպիսի վնասվածքով հազարից մեկն է ողջ մնում» appeared first on ԳԱԼԱ.