Qırım MC prokuraturası yarımadada bir cemaat jurnalistiniñ yaqalanuvı ile bağlı cinayet davasını açtı 

Dekabrniñ 28-nde, bazarertesi künü, Qırım MC prokuraturası saba Canköy rayonında öz evi yanında “kütleviy tedbir teşkil etyuv içün” yaqalanğan cemaat jurnalistiniñ “qanunsız tevqif etilüvine köre” cinayet davasını açtı (Ukraina Ceza Qanunnamesiniñ 146 maddesiniñ 2 qısmı). 


Bu aqta müessise Telegramda haber etti. 


Qayd etilgenine köre, maddeniñ sanktsiyası beş yıl apis cezasını ve Qırım MC ve Aqyar şeerinde Milily polisniñ baş idaresi oğraşacaq mahkemeden evel tahqiqatnı közde tuta.


Jurnalistniñ adı añılmay, amma bugün saba Cankoy rayonında öz evi yanında Rusiye quvetçileri bu qabaatlavğa köre cemaat jurnalisti Vilen Temeryanovnı yaqaladı. 


Qırım sakini Temeryanovnıñ davası ile bağlı protokolda qorantası aqqında yalan malümat yazılğan – advokat.


Advokat Emil Kurbedinov, dekabrniñ 28-nde saba Canköy rayonında öz evi yanında yaqalanılğan cemaat jurnalisti Vilen Temeryanovnı Rusiye nezaretinde olğan Aqmescitniñ Merkeziy rayon mahkemesine ketirgenlerini haber etti.


Dekabrniñ 28-nde saba "Qırım birdemligi" cemaat birleşmesiniñ faalleri, Rusiye polisiniñ hadimleri cemaat jurnalisti Vilen Temeryanovnı "mecburen iş maşinağa oturtıp evden alıp kettiler", dep haber etken ediler. 


Noyabrniñ başında Rusiye politsiyası qırımtatar faali, "Grani.ru" neşiriniñ jurnalisti Vilen Temeryanovğa qarşı memuriy bozuv aqqında eki protokol tizdi. O, Aqmescitte Rusiye kontrolindeki Qırım garnizon arbiy mahkemesi ögünde, insanlar Qurmandaki "Hizb ut-Tahrir davası" mabüslerine qol tutmağa toplaşqan yerde tutuldı.