Covid-19 белән офис хезмәткәрләренең күбрәк авыруы билгеле булды
(Казан, 17 октябрь, «Татар-информ»). Россиялеләр арасында Covid-19 белән офис хезмәткәрләре күбрәк авырый. Бу хакта Россия Кулланучы хокукларын яклау буенча күзәтчелек хезмәтенең (Роспотребнадзор) җитәкчесе Анна Попова «Беренче канал»га биргән интервьюсында сөйләде.
«Бүген авырып киткән эшләүче халык арасында авыручыларның иң зур өлешен офиста эшләүче кешеләр тәшкил итә», — диде Анна Попова.
Шул сәбәпле, Россия Кулланучы хокукларын яклау буенча күзәтчелек хезмәтенең җитәкчесе коронавирусны профилактикалау кагыйдәләрен үтәргә кирәклегенә игътибарны юнәлтте. Аның фикеренчә, эпидемиягә каршы чаралар ике атна дәвамында авыру йоктыру күрсәткечләрен киметәчәк.
«Татар-информ» агентлыгы хәбәр иткәнчә, Россия Кулланучы хокукларын яклау буенча күзәтчелек хезмәтенең Татарстан буенча идарәсе эштә чәй табыны янына җыелмаска һәм киңәшмәләр үткәрүдән баш тартырга өндәгән иде.