9 яшьлек улын кыйнаган һәм җәзалаган Зәйдә яшәүче хатын-кыз эшен судка җибәрделәр
(Казан, 25 июнь, «Татар-информ»). 9 яшьлек улын кыйнаган һәм җәзалаган Зәйдә яшәүче хатын-кыз эшен судка җибәрделәр. Бу хакта Россия Тикшерү комитетының ТР буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итте.
Билгеле булганча, 2018 елдан 2020 елга кадәр 45 яшьлек хатын-кыз даими рәвештә үзенең 9 яшьлек улын кыйнаган.
Ул билбау белән баланың кулын урындыкка бәйләгән һәм башына суккан. Исерек чакта улын таяк белән кыйнап, аннары башын салкын суга тыккан.
Моннан тыш, балага теләсә-нәрсә белән бәрә торган булган.
Малай еш кына ачлыктан интеккән һәм аңа «авырлык җитмәү» диагнозын куйганнар.
Элегрәк «Татар-информ» Зәйдә яшәүче хатын-кызның 9 яшьлек улын кыйнауда гаепләнүе турында хәбәр иткән иде. Тикшерү комитеты кыйнау һәм ата- ана вазифаларын үтәмәү турында ике җинаять эше кузгаткан.
Гаепләнүче гаебен танымаган. Хәзер аның язмышын суд хәл итә.